Usem Läbe vore Tanne

Äs Gchifu heit dir mängisch, dir Mönsche! I nün vo zäh Fäu, woni mit derbi bi, wüssed dir nid emau meh, was dr Grund vo au däm isch gsi. Es gseht grad so us, aus ob dir öppis ganz Wäsentlichs verlore hättet und das mit Egokämpfli müesstet zrächt rücke. Derbi merket dir gar nid, wiä aues nur no schlimmer und schäbiger chunnt äso. Zu däm Thema faut mir grad ä Gschicht i, wo vor churzem passiert isch.

Dr Jogger

Amne Tag, wo dr Wind ordeli zoge het, hani mini Äscht so richtig useghäbt. Äs isch mir vorcho, aus obs mi gli würdi uflüpfe, so beschwingt het sich das agfüeut. I liebe das Gfüeu, so eis zsi mitem Wind. Scho nid grad so, dass mir d Äscht abbräche, aber äs darf scho chli hütze. «Da hät sich äuä öpper gäbig verlüffe», han ig mir no so dänkt. Das isch ä Jogger gsi, weisch so ganz ä traditionelle mit Stirnbang, Pulszöuer, churze Hösli, Sportsocke und guete Turnschue. Serig chöme öppe bi mir verbi, aber dä hani no niä gseh. Chüchend het är sich a mim Stamm abgstützt und het immer wieder dr Chopf derbi gschüttlet.

S Boumhärz

Sis Läbe isch äuä grad nid s stimmigschte gsi. Mit eim lute Süfzger het är sich niedergla und isch mir zwüsche d Wurzle ghocket. I ha de zersch mau gluegt, dass sich dä Bsuecher wieder ä chli bsinnt und zue sich chunnt. Dä isch völlig usser Atem gsi. Nach ämne Wiili isch är ruhiger worde. Sini Häng, won är vor sis Gsicht gleit het, hei zitteret. Dä isch richtig verzwieflet gsi i däm Momänt. Da är mi nid het chönne ghöre, hani ihm ou kes Gspräch abote. Schiinbar hets ihm guet ta, eifach chli bimer zsi. I ha de mis Boumhärz uf sis glänkt u ihm so mini Offeheit offebart. Äs het grad chli öppis brucht, bis sis Härz o ä Schlitz ufta het.

Säubschtgspräch

I weiss, i sött nid drüber Schmunzle, aber viu Mönsche füehre Säubschtgspräch. I weiss nid genau, was dir mit däm bezwäcket. Us au dene Milliarde vo Mönsche, wo uf dere Ärdchugele umewuslä, wird sich doch wou no eine finge, wo unbezaubar isch. Schiinbar doch nid. Dr Jogger het sini Häng vo sim Gsicht glöst und sä uf d Ärde abegleit. I nime mis Bänzin ou us dr Ärde, das isch scho mau ä weisi Entscheidig gsi. Mit mine Wurzle hani ihn de ganz sanft afo chutzele. Äs fiins Lächle isch fürecho. Är het sich äuä grad anä schöne Momänt zrügg bsinnt.

Em Jogger sis Gchifu

S Gsicht isch de aber gli drufabe wieder ganz ärnscht worde. Itz isch s Gchifu losgange. Wenn mä sich unbeobachtet füeut, chunnt s wahre Ich de scho füre. Es tönt so, aus ob är isch betroge worde, äuä ir Liebi. Sini Hang het är mittlerwile zure Fuscht zämebaut u wiud gfuchtlet dermit. I säge euch jetz nid, uf weli Art är gschumpfe het. Wenn äs Bluemli ume wär gsi, gloub mir, das wäri uf dr Steu verweukt. Mit eim Ascht hani ihn afo berüehre. Das het nä de chli usem Konzept bracht und nä chli versöhnlicher gmacht. Bitteri Träne si abeglüffe. Diä si us töifschtem Härze cho. Är het äuä a diä Liäbi gloubt, wo itz isch zerrisse.

Blindligs i d Beziehig

Ufgrund vo sine Säubschtgspräch hani de usegfunge, dass sie ä angere gfunge het, eine mit me Verdienscht. So Rohchoscht chasch nid gäbig verdoue, das liegt dir ufem Mage. Fragsch di scho, werum är das nid scho vorhär gmerkt het. Dä isch blindlings i diä Beziehig inegrütscht. Ja, Froue chöi wahri Verfüehrigskünstlerinne si. Zum Glück het sini Schwes gmerkt, dass s Verhaute vo sire bessere Häufti nid ganz koscher isch und het das chli unger d Lupe gno. Uf Facebook isch es de fürecho, sie het ä angere. D Schwes het das Foto mitem Brüetsch teilt u so het eis s angere ergä. Äs richtigs Drama!

Itz chunnts neu

Mi Bsuecher isch entspannter worde. Diä letschi bitteri Träne isch no über sini Backe grügelet. Mit eim Schwung het är sich diä vom Gsicht gwüscht und het sich wieder ufgrapplet. Dir Mönsche heit ä enormi Wiederbeläbigschraft. Ä Niederlag schmärzt euch, bricht euch viellicht fürne Momänt s Härz……aber denn stöht dir uf und machet aues neu. Das isch ä Gab. Diä Fründin isch nümm lang sini Fründin gsi u ihri neui Beziehig het o nur es paar Wuche ghäbt. Diä Erfahrig het mim Bsuecher Chraft gä.

D Tanne isch dr Boum vor Erkenntnis und Erneuerig

Är het afo sis Läbe ändere. So, dass es ihm meh z Gunschte chunnt. Ändlich het si Wunsch nachere Familie Platz übercho, sit är nümm ä Drizähnerschicht muess schiebe. Är setzt meh Gränze. Es liebs Froueli het nid lang uf sich la warte. Äs chunnt eim grad vor, aus obs dä Crash hätti brucht, dass är zur Läbesbsinnig cha cho. Mä seit äuä nid für nüt, dass hinger jedem Schicksau dr Zouber vomne Neuafang steit. Ou wenns Gfüeu hesch, aues geit verlore, het s Läbe ä Plan für di parat. U wenn di vertrouensvou uf diä Veränderig ilasch, wird dir vieles z Gunschte cho. U dr gröscht Priis, wo chach gwünne, bisch du säuber, denn aus was d bruchsch im Läbe, das steckt sowieso scho i dir inne. I bi dr Boum vor Erkenntnis. I wecke neui Chräft i dir.